Leirsesongen er i gong

Det er tendensar til vår i Matsue, men på fjellet er det framleis vinter. 14.-16.  februar hadde vi Snow Fun Camp. Leirsjef Johanna Tervonen og eg hadde det artig med å lage snølykter før deltakarane kom.

Nei, det er ikkje snøballar, men sjokolade til alle på Valentin-dagen.

Katsuhiro Igi talte om Jesu kjærleik, og kva Bibelen seier om kjærleik og ekteskap.

Her er heile gjengen, etter bibeltimen på laurdag føremiddag. Så var det tid for å fare i skibakken. Men Igi måtte tilbake til kyrkja si i Tamashima og førebu seg til søndagen.

Denne jenta var ivrig på langrenn. Tjukke sokkar og hue lånte ho av meg. Denne hua strikka eg forresten til meg sjølv då eg gjekk på ungdomsskulen, trur eg, så ho er nokre år gammal...

Denne karen kom frå Tottori. Elles kom deltakarane ifrå Kobe og Fukuyama. Dessverre fekk eg ikkje med meg nokon ifrå Shimane denne gongen.

 Dei fleste valde slalomski

Eittåring David Thorsen kjøpte seg snøbrett på ein bruktbutikk i Matsue i romjula. Han er fornøgd med kjøpet.

Desse tre lånte seg langrennski på leirplassen. Slikt får ein dessverre ikkje leige på skisenteret.

Eg kan vel seie vi hadde nok snø på Hiruzen. Dette er inngangsdøra til Bethlehem Lodge.

Heldigvis var der ingen under her då det rasa av taket utanfor matsalen....

Johanna er utdanna lærar og tek i bruk pedagogikken i bibelundervisninga. Alle fekk bidra med sine tankar om kva kjærleik er. Eg låner ideen til studentleiren neste veke, då eg skal ha seminar om kjærleik.

Søndag var det sol og mildt vêr. Her er Johanna og ein deltakar frå Kobe på veg til gudsteneste i Hiruzen kyrkje.

Kyrkjeorgelet i Hiruzen kyrkje. Dei har også piano, men når denne dama spelar, føretrekkjer ho orgelet.

 Lea Lukka preika i kyrkja over teksten frå Matt. 5, 38-48. Det vart ei god avslutning på temaet vi hadde på leiren, om kva kjærleik er. "Elsk dykkar fiendar", seier Jesus.

Liv Bakke er klar til å ta med seg passasjerane sine tilbake til Kobe. Takk for laget!

Men kven er det som går ute i tøfler?!

Les meir om Snow Fun Camp og Valentindagen på nlm.no 1.mars. I heile mars blir det mykje Japanstoff der, så følg med!

Neste veke er det ny leir, frå 4.-7. mars. Då er det studentlaget (KGK) som arrangerer. Eg skal ha med meg ei jente herifrå Matsue og ein gut ifrå Izumo. Tirsdag morgon køyrer vi til Fukuyama i Hiroshima fylke. Eg har vore der fleire gonger med bil, men eg tullar alltid litt med å finne fram på slutten. Håper det går bra når eg har to japanske passasjerar.

På studentleiren skal eg ha eit seminar med tema "kjærleik", og det er prosjektet mitt denne veka, i tillegg til alt som skal skrivast til Utsyn, heimeside og LMF-bladet, og bibelstudie, Bible Class og Bible Club. Nei, arbeidslaus er eg ikkje.

Til deg som ber: Be for førebuinga til leiren, for alle studentane som kjem (ca 40 påmelde), for talaren, seminarhaldarar, og at det går bra på turen.

Blomstrar i Guds hage

Eg er glad i blomster, og liker å ta bilete av blomster, men det er sjeldan eg kjem på å spandere noko på meg sjølv. Men sist måndag var eg lei av å sjå på dei tomme blomsterkassene der det berre grodde ugras. For ugras veks også om vinteren her. For ein liten penge fekk eg kjøpt desse søte blomstrane og planta dei ut.

Dagen etter snødde det igjen, men ikkje verre enn at blomstrane overlever. Dei stod truleg under snø utanfor butikken før eg kjøpte dei, også. No er snøen borte igjen, men andre plassar i Japan har det vore kaotisk i helga. På nyheitene les eg at 5 er omkomne og omlag 600 skadde, og mange tog og fly er innstilte.

Ei natt var det 3 minusgrader her, og morgonen etter måtte eg ha meg ein tur og gå i den knirkande snøen. Rett nedanfor leilegheita mi fann eg desse "isblomstrane".

Torsdag kveld har eg bønnegruppe for Bible Club ilag med desse medhjelparane mine. F.v. det amerikanske ekteparet Scott Menking og Carmella Lieske, og japanske Ikuko Takeda. Eit spesielt takke-og bønneemne denne kvelden var seks jenter Carmella hadde invitert til Bible Club på fredag. Ei av dei vart dessverre forhindra, men fem av dei kom.

Dei tre til høgre er studentar frå Shimane universitet. I slutten av februar reiser dei på ein månads språkstudie til Arkansas. Fleire som tidlegare har vore der, har kome tilbake til Bible Club seinare fordi dei ville lære meir om Bibelen. Ei anna gruppe reiser ilag med Carmella og Scott på eit kristent program i Florida omtrent samtidig.

Desse to går på ein toårig høgskule ein annan plass i byen. Carmella underviser også der.

Alle jentene ga uttrykk for at dei likte seg og at dei har lyst å komme igjen. For fleire var det første gong dei las i Bibelen. Dei fekk med seg kvar sitt "Manga Messiah"-hefte om Jesu liv, død og oppstode. Denne kvelden var teksten frå Joh 14, om Jesus som er vegen, sanninga og livet.

Komande fredag reiser eg på Snow Fun Camp (eg får dessverre ikkje med meg ein einaste student...), så vi har bestemt Bible Club på torsdag denne veka. Håper å sjå fleire av dei nye jentene igjen.  Og den einaste guten blant studentane skreiv i loggboka: "Vi treng fleire gutar!"

Samme kveld skreiv ei av dei nye jentene på Facebook:

"Idag har eg vore med på Bible Club for første gong!
Maten til Inger var så god!!
Og takk, Carmella, for at du køyrde oss. 
Eg hadde ei fin stund ilag med dei.
Eg vil vere der også neste torsdag!"
 

Blomstrar i Guds hage - ja, der er mange slags blomster. Be om at desse fine ungdommane vil opne seg og strekkje seg mot lyset, og slå djupe røter i Guds ord.

Hideki Class

I løpet av ei veke les eg Bibelen ilag med fleire, både med enkeltpersonar, med to eller med ei større gruppe. Den ferskaste gruppa starta opp i slutten av januar. Desse to damene kjem heim til meg ein dag i veka. Biletet er frå første bibelstudiet. Yumiko til høgre har vore ein kristen i litt over eit år, og ho er ivrig i å få med seg andre. "Kan vi ikkje starte bibelstudie med "M-san"?", spurde ho. Eg kom på at eg hadde eit studiehefte i hylla som venta på eit høve til å bli brukt for nokon som vil lese Bibelen for første gong, og no kom det til nytte. Det er skrive av pastor i Yonago kyrkje, Hideki Matsumura. Det er også han som er president i WJELC for tida. Han har skrive eit hefte som heiter "Bible Class", men alt anna enn tittelen er på japansk. Likevel er det forholdsvis enkelt for meg å lese, for han har skrive lydskrift (hiragana) over alle teikn, så det er lett å slå opp i ordbok for ord eg ikkje kan.

Så dette kan bli ei god lærebok for meg, også. Til dømes lærte eg eit nytt ord: "Gentleman". Når Jesus står for hjartedøra og bankar, viser det at han er ein "gentleman" som ikkje trengjer seg på, men ventar til vi opnar døra.

Det verkar som om denne boka er midt i blinken for M-san. Og vi har alle sansen for pastor Matsumura. Etter første bibelstudie skulle vi bestemme namn på denne gruppa. Kva skulle vi kalle oss? "Bible Class"? Nei, vi har allereie ei gruppe med det namnet. Kva med "Matsumura Class?" Jau, det høyrdest bra ut. Eller kanskje "Hideki Class?!" Jau, det var vi alle samde om var ein god idé. Vanlegvis bruker vi ikkje førenamn på prestane, men i Yonago kyrkje går presten oftast under namnet "Hideki-sensei", så kvifor ikkje?

Etterpå sende eg ein e-post til Hideki-sensei med bilete av dei to blide damene ovanfor, og fortalde om namnevalet. Eg fekk eit muntert svar tilbake, og han tek det som ei ære å bli oppattkalla.
Biletet nedanfor er profilbiletet hans på Facebook, som eg har lånt for anledninga.

Vi har allereie gått gjennom fire av dei sju kapitla, så spørsmålet er då: Kan vi framleis kalle oss "Hideki Class" når vi er ferdige med boka?
 
At "M-san" set pris på å lese Bibelen, er vel dei fine blomstrane eit vitnemål om.

 

Andre bibelstudie
Ei lita oversikt viser kva bibelstudie eg har i løpet av ein månad:

• Bible Class (Matsue) -  fredag føremiddag 2 g pr mnd
• Bible Class (Izumo)  -  søndag e.m. - 1 g pr mnd
• Bible Club: Kvar fredag kveld
• To tidlegare Bible Club-medlemmer: Ca 2 laurdagskveldar pr mnd
• Bibelstudie med ei kinesisk jente: Tirsdag ettermiddag eller kveld
• Koto-gruppe-bibelstudie - 2 g pr mnd (laurdag e.m.)
• Hideki Class  - vanlegvis kvar onsdagskveld

 Ta dei gjerne med på bønnelista di!

Helgebesøk

Det er allereie gått ei veke, men av ein eller annan grunn går det ikkje like fort å legge ut nytt stoff her som på Facebook. Og veka går fort. Først rydde opp etter gjestar, så reise til Kobe på styremøte, og så er det plutseleg helg igjen...
Sjølvaste sjefen var på besøk forrige helg. Her er stedlig representant Gunnar Urstad ilag med kona Ruth og yngste dotter Hanna Emilie. Det vart ein sein middag på laurdag, for det var mykje vi skulle gjere den ettermiddagen. Etter ein lang biltur frå Kobe ville dei ut og strekkje på føtene. Og det vart ein god spasertur, der dei fekk sjå kvar Maria budde for snart to år sidan, og ein sportsbutikk for å sjå på skiutstyr, og så måtte eg også vise dei skobutikken som Maria likte så godt.
Men det Gunnar eigentleg skulle, var å ha medarbeidarsamtale med meg. Det foregjekk på ein kafé på eit handlesenter, medan Ruth og Hanna Emilie gjekk rundt i butikkane.
Vi rakk heim og ete middag i 19.30-tida, og rakk onsen-badet ein time før stengjetid. På veg heim leda guiden deira sjåføren inn på ein litt feil veg, som førte til at Kobe-bilen med sommardekk plutseleg stod fast i ein bakke. Det hadde nemleg snødd og hagla ein del medan vi sat i det varme badet.
Men Kobe-folk kjem ikkje til vinterland utan kjettingar i bilen.

Etter at bilen hadde fått skodd seg skikkeleg, var det ikkje problem å komme vidare. Men det vart ein litt sein kveld.

Søndag var Urstad sine til kyrkje i Yonago og kom tilbake så vi rakk ein joggetur før nonsmat og kveldsgudsteneste.

Det var eigentleg min jobb å preike på denne gudstenesta, men då Gunnar ringde og spurde om dei kunne kome den helga, kom eg på å spørje han, og han sa ja ganske med ein gong. Og då eg i tillegg fekk ei japansk veninne til å tolke, var det heilt midt i blinken at dei kom denne helga! I tillegg hadde Hanna Emilie fri frå skulen på måndag, som gjorde at dei kunne vere over, og dei fekk seg også ein lang skidag på veg heimatt.

Det var litt historisk å ha familien Urstad med på den internasjonale gudstenesta, for det var dottera Maria som var drivkrafta til at vi starta opp desse gudstenestene for nesten to år sidan. "Kva betyr det å be?" var temaet Gunnar preika over. Ei veldig god preike, som enno fleire skulle ha høyrt! Men eg er glad for alle som kom. Hittil rekord, med 27 vaksne, ein tenåring og to små born. Fleire ikkje-kristne kom også for første gong.

Her er talar og tolk med kvar sin i-pad. Det er nye tider... Ikuko Takeda er engelsklærar ved ein vidaregåande skule, og snakkar engelsk flytande. Og sjølvsagt også flytande japansk. Ho gjorde ein mykje betre jobb enn eg kunne ha gjort dersom eg skulle tolke, som planen var heilt fram til fredag kveld.

Det var ei ganske stor forsamling denne gongen. Tenk om dette var eit gospelkor eg kunne dirigere!
På gospeløvinga i dag var vi fire...

Det vart mange gjensyn denne kvelden: Her er Nobuko Kajinishi i prat med Ruth.

Her er Gunnar ilag med Junichi Ishimaru, som no er prest i Arashima.

Og Hanna Emilie traff igjen barnevakta si, Aika Ishimaru.

Praten går, og det er god stemning etter gudstenesta.

Jamie i midten, frå Florida, studerer dette året i Osaka, og var på besøk i Matsue denne helga. Dei to japanske studentane var i Florida i fjor på eit månads studieopphald med homestay i kristne familiar. Jamie har vore med og tatt imot studentar frå Matsue i fleire år. Mange studentar får eit første møte med kristendommen under dette opphaldet, og fleire har kome fast på Bible Club etter det.
Også denne våren, i februar-mars, reiser Carmella og Scott med ei gruppe på 16 studentar. Du som ber, må gjerne hugse på dei, også.

Nytt år

Då skulle det iallfall vere på tide å ønskje dykk godt nyttår! Dette blir framhald frå bloggen 2. juledag. Det er blitt fredag i romjula, og Liv Bakke og David Thorsen har kome seg trygt fram på sommardekk, med kjettingar det verste stykket. Sjølv om mange studentar hadde reist tilbake til heimplassen/heimelandet, var andre komne heim til Matsue på nyttårsferie, så vi vart ein bra flokk likevel.
(Biletet ovanfor er tatt av David Thorsen)

Neste morgon hadde vi fått meir snø. Dette er utsikta frå inngangsdøra mi.

Nordmenn kosar seg med japansk mat.

Etter besøket var reist, hadde eg meir gjestar. Nyttårsaftan ettermiddag var det ungdommane i kyrkja som hadde sitt årlege juleselskap hos meg. Til vanleg er det ei eller to som samlast på søndag morgon før gudstenesta, men no var også to av dei eldre ungdommane komne heim på ferie.

Frå klokka 22 samme dag hadde eg ope hus for fellesskap og bøn før det nye året. Ei kinesisk jente som har vore med i Bible Club tidlegare, hadde sett invitasjonen på Facebook og spurde om ho også kunne kome. Og etter denne kvelden bestemte ho seg for å komme fast på Bible Club igjen. Ei japansk jente som kom på den internasjonale gudstenesta i desember for første gong, har vore med på fleire samlingar i jula. Ho har lyst å lære meir om Gud, så ho vil også komme på Bible Club og i kyrkje så ofte ho kan. Desse to jentene kan de gjerne vere med og be for.

På nyttårsdag er det fleire som kler seg i kimono.

Fleire av dei som var hos meg på nyttårsaftan, vart også med i kyrkja på gudsteneste på nyttårsdag, med lunsj etterpå.

Fru Kajinishi liker også å kle seg i kimono, men fordi ho arbeidde på kjøkkenet, måtte ho ha spesialsydd forkle. Her har ho tatt det av til ære for fotografen, og pastor Kajinishi fann ut at forkledet kunne passe godt som prestekjole...

Ein av familiane i kyrkja driv fiskebutikk med levering av mat. Før nyttår hadde dei det veldig travelt. Omtrent 100 slike øskjer med nyttårsmat hadde dei laga og levert på bestilling. Og tenk, så hadde dei ei til overs for meg, også! Men det var altfor mykje for meg å ete åleine, så heldigvis heldt maten seg til Bible Club to dagar seinare. Då kombinerte vi japansk nyttårsmat og pizza...

3. januar var framleis ferie for studentane, men fleire møtte likevel opp. Så på Bible Club har vi verken hatt juleferie eller nyttårsferie, men heller meir aktivitet enn elles.

Etter å ha hatt så mykje folk ut og inn heime og vore vertinne stort sett heile jula og nyttåret, var det godt å komme seg litt vekk. Frå måndag til tirsdag forrige veke tok eg ein tur til Kari Opperud i Nima.

Sandstranda i Nima er fin om sommaren, men solnedgangen i januar er også verdt eit bilete.

Tirsdagen var det fint vêr, så vi la ut på ein liten fjelltur. Det viste seg at det var godt å ha gode sko, og eg var iallfall glad for at det var tau å halde i på dei brattaste partia. Mot toppen var det ganske mykje snø, også, så det var ikkje alltid like lett å få skikkeleg fotfeste.

Sjølv om det tok berre vel ein time til toppen, smakte det godt med nistemat, te og sjokolade.

"Vær forsiktig, lille fot, hvor du går." Ein roten kjepp er kanskje ei falsk trøyst, men det kjendest litt betryggande å ha noko i handa der det ikkje var tau å halde i...

Snøen her i Matsue kjem og fer, men før helga hadde vi bra snøfall igjen. Her var eg ute på fredag morgon og tok bilete av tunge sakuratre-greiner før den tunge snøen fall av. Igjen var det snø på ein fredag, som igjen førte til at to damer ikkje kom på bibelklassa mi den morgonen. Kvifor skal det "alltid" vere snø på ein fredag?!

Nokre av dei som kjem på Bible Club fredagskveldane, har iallfall lært å kle seg etter vêret.

Eit nytt år med nye moglegheiter. Til helga er det internasjonal gudsteneste igjen. Denne gongen har eg fått Gunnar Urstad til å preike i staden for meg. Han og Ruth og yngste dottera Hanna Emilie kjem oppover på komande laurdag. Det var Maria, eldste dotter til Ruth og Gunnar, som var drivkrafta bak å starte internasjonal ungdomsgudsteneste for nesten to år sidan. No kan eg drive litt PR og gjere folk nysgjerrige på å treffe foreldra og søstra hennar.
Forhåpentlegvis vil også fleire kyrkjemedlemmer møte opp, sidan Gunnar også er leiaren for NLM her ute. Det er mitt håp og mi bøn at dette arbeidet "mitt" kunne bli meir ein del av kyrkja sitt arbeid. Eg set pris på om du som ber, kan ta meg med i bøn i dagane og månadene framover.