Monday, December 19, 2011

Forsmak på jula


Fredag føremiddag:
På fredag morgon serverte eg dei første småkakene. Denne guten på 2 år likte iallfall krumkaker med krem! Berre to vaksne og eitt barn kom på bibelklassa på føremiddag, men vi hadde ei fin stund, med bibelstudium om engelen sin bodskap til Maria.


Fredag kveld:
Om kvelden var det som vanleg Bible Club, og ein del fleire enn på føremiddagen. Til saman var vi 15 på bibelstudiet. Fredagen før hadde vi snakka om Maria, så denne kvelden var det Josef sin tur. Eg utfordra gutane: "Kva vil du gjere om kjæresten din seier at ho er gravid, og du veit at du ikkje er far til babyen?" Dei fekk noko å tenkje på. Ein av gutane skreiv i loggboka etterpå: "I think Joseph is kind and cool. " Og han legg til (omsett til norsk): "Å vere snill er også komplisert. Men å ha ein kjærast som trur på Gud, er ein god ting." Han som skreiv dette, er ikkje ein kristen, men han er ein av dei eg ser det har skjedd ei forandring med sidan han byrja å komme på Bible Club i april i år.


Her er eit utval av ungdommane som var på Bible Club. Dei to med uniform går på vidaregåande og kom rett frå skulen.

Laurdag kveld:
Etter gospeløving og ein tur innom eit arrangement på universitetet var eg ute på jentekveld. Ei av dei som kjem på Bible Class, hadde invitert meg og ei av sine engelskelevar ut på restaurant.


Dei to hadde laga mat til familien før dei tok seg fri for å gå ut. Maten var god, og praten gjekk lett. Då eg fortalde at eg skulle til Izumo kyrkje på søndag, sa mitt nye bekjentskap at ho hadde gått på søndagsskulen i den gamle lutherske kyrkja der for 37 år sidan, og då var der ein norsk misjonær. Verda er ikkje stor! Etter litt detektivarbeid har eg funne ut at det truleg måtte vere Tore Jåtun som var der på den tida.


Eg lovde damene å legge ut bilete på bloggen i dag, så eg håper dei er innom og sjekkar. Her er det tomme fat og mette magar. Samtalen gjekk også innom Bibelen, om vin og nattverd og påskemåltid og blodstryking og utgang frå Egypt, om Moses og dei ti boda, om religion, buddhisme og kristendom og mykje meir. Så om eg kom seint heim og var dårleg førebudd til søndagsskule og gudsteneste i Izumo neste dag, trur eg likevel det var ein vel anvendt laurdagskveld.

Søndag:


I går var eg organist på gudstenesta i Izumo, etter først å ha hatt andakt på søndagsskulen. Izumo kyrkje har det beste orgelet i kyrkjene våre på heile nordfeltet. Berre dumt at det er for langt unna til at eg kan øve der meir enn den lille halvtimen før gudstenesta byrjar.


Forsamlinga i Izumo vedkjenner trua: "Ware wa tenchi no tsukurinushi, chichi naru zenno no Kami o shinzu." (1. trusartikkel)


Det fjerde lyset er tent, og det er ei veke att til jul. Neste søndag blir det dåp og konfirmasjon i denne kyrkja. Ei eldre kvinne og ein mann i 50-åra skal bli døypt, og kona til denne mannen, skal bli konfirmert. Ho vart døypt som barn, men har ikkje vedkjent trua før, så ho blir konfirmert no i vaksen alder. Vi gler oss med dei, sjølv om vi gjerne skulle ha opplevd både dåp og konfirmasjon i Matsue, også...


Det er mange ting som må ordnast til jul. I Norge er det ikkje vanleg å bone kyrkjegolvet på ein søndag, akkurat, men når det skal vere dåp, må golvet også skine! Sasaki med moppen vil gjerne helse til alle misjonsvenner i Norge: "Vi må møtast igjen!"

4 comments:

  1. God jul til deg Inger! Hyggeleg at du tok deg tid til å svare elevane som valde Japan når dei skulle skrive om misjon:) Kristin S. Ottesen

    ReplyDelete
  2. Hei, Kristin! Så det er du som er Strikkebesta! Då er det mysteriet oppklart.

    Artig at elevane tok kontakt. Korleis gjekk det med presentasjonen? Hadde vore artig å sjå korleis resultatet vart!

    ReplyDelete
  3. Fortsatt God Jul kjære Inger og takk for Julehelsing!
    Her stormar det ute, men inne er det varmt og godt :-)

    ReplyDelete
  4. Takk for helsing, Sigrid! Håper stormen har gitt seg. Her er snøen snart regna bort igjen.

    ReplyDelete